Liwat nga ginpamatud-an sang Bombo Radyo Philippines nga nagapangibabaw ini sa patag sang broadcasting.
Ini matapos nagdaog sang tatlo ka major awards kag nakabaton sang duha ka special citations sa prestihiyoso nga 47th Catholic Mass Media Awards ukon CMMA.
Ginhingadlan ang flagship newscast sang network nga Bombo Network News bilang Best News Program.
Isa ini ka back-to-back recognition matapos nakuha man sang amo nga programa ang nasambit man nga pasidungog sang nagligad nga tuig.
Nakakuha man sang major award ang Bombo Special Report nga ginkilala nga Best Business News.
Samtang ang Pinoy Memories sang Star FM Iloilo nga nagdaog bilang Best Entertainment Program.
Nakabaton man ang Bombo Radyo Philippines sang duha ka espesyal nga citation.
Ini amo ang Bombo Lifestyle para sa Best Public Service Program kag ang “Istoryang Pasada: Takbo” sang Star FM Manila para sa Best Counseling Program.
Sa sini nga 47th Catholic Mass Media Awards, nag-qualify bilang finalists ang mga programa sang Bombo Radyo Philippines sa siyam tanan ka mga kategorya.
Ini sa ka pamatuod sang madinalag-on kag masangkad nga presensya sang network sa balita, public affairs, kag entertainment programming.
May iban pa nga programa sang Bombo Radyo nga ginkilala bilang finalists.
Finalist ang Bombo News and Views Morning Edition sang Bombo Radyo Cebu para sa Best News Program.
Nalakip man sa finalists ang Bombohanay sa Udto sang Bombo Radyo Cebu para sa Best News Commentary Program.
Yara man sa listahan ang Bombo Special Report sang Bombo Radyo Philippines kag The Seven Last Words sang Bombo Radyo Cauayan para sa Best Educational Program.
Nalakip man sa finalists ang It’s All for You in the Morning sang Star FM Bacolod para sa Best Entertainment Program.
Ang Good Morning Philippines sang Bombo Radyo Iloilo, Bombohanay Ed Ugto sang Bombo Radyo Dagupan, kag It’s All for You in the Morning sang Star FM Dagupan ang lunsay finalists para sa Best News Feature.
Ang Sarming Ti Biag sang Bombo Radyo Cauayan finalist man para sa Best Drama Program.
Ang Catholic Mass Media Awards gin-establisar sang tuig 1978 ni anay Archbishop Jaime Cardinal Sin.
Ini nga award-giving body nagahatag sang pasidungog sa mga indibidwal kag institusyon nga nagagamit sang media sa pagpasanyog sang kamatuoran.
Ginahalad sang Bombo Radyo Philippines ini nga mga kadungganan sa tanan nga mga tagpalamati kag tumalan-aw diri sa Pilipinas kag sa iban nga pungsod.
Kamo ang padayon nga nagahatag inspirasyon sa 32 ka fully digitalized stations nga magdul-ong sang masaligan nga balita, serbisyo publiko, kag mga programa nga nagabulig sa komunidad.
