ROXAS CITY – Patay ang Book Keeper sang Barangay Conciencia sa banwa sang Panitan matapos nga ginluthang sang riding in tandem sa Barangay, Agbabadiang sang nasambit man nga banwa.
Ginkilala ang biktima nga si Joey Fegarido 51-anyos, Book Keeper kag residente sang Barangay Conciencia sang nasambit nga banwa.
Sa inisyal nga imbestigasyon ni Police Corporal Mark Rendon, imbestigador sang Panitan Municipal Police Station nga samtang nagamaneho sang tricycle ang biktima papuli na kuntani sa ila nga balay gikan sa banwa sang Pontevedra matapos nga nagbakal sang semento hinali na lamang ini nga ginluthang patay sang duha ka wala matumod nga suspek nga sakay sa motorsiklo.
Gilayon naman nga gindala sa Bailan District Hospital ang biktima apang gindeklarar naman ini nga dead on arrival.
Mahibaluan nga nag-angkon naman sang apat ka pilas sa lawas ang biktima.
Narekober naman sa crime scene ang anom ka mga basiyo sang ginaalegar kalibre .45 nga armas-luthang.
Gindugang pa ni Rendon nga base sa inisyal nga pagpangusisa sang mga kapulisan sa himata ni Fegarido nga wala man sang kontra ang nasambit nga biktima.
Sa karon may yara na sang ginasunod nga mga persons of interest ang mga kapulisan nga posible imbolbado sa kamatayon sang biktima.
