ROXAS CITY, CAPIZ- Liwat nga nagapanawagan ang Department of Health (DOH) sa publiko, ilabi na sa mga kababainhan, nga mas mangin aligmat sa ila nga ikaayong-lawas kag regular nga magpa-checkup agud malikawan ang posible nga pag-angkon sang breast cancer.
Sa interview sang Bombo Radyo kay Dr. Fadzree Tandoc, Medical Officer III sang Mambusao District Hospital, iya ginpahayag nga ang breast cancer ang isa ka sahi sang kanser nga nagakabuo sa suso, sa diin masami nga naga-umpisa sa mga duct ukon glandula sang gatas. Nagatuga ini sang bukol, pagbag-o sang korte ukon panit sang suso, kag kun kaisa ang pagguwa sang likido sa ayutongan.
Suno kay Dr. Tandoc, nagapabilin ang breast cancer nga isa sa mga nagapanguna nga rason sang kamatayon sang kababainhan sa pungsod Pilipinas. Subong man, nagapabilin nga mataas ang posibilidad sang pag-ayo kun ini ang timprano pa nga matukiban.
Pahayag nya, importante man ang self-breast examination ka gang pagtambong sa mga libre nga screening nga ginapatigayon sang mga ospital kag lokal nga gobyerno.
Samtang, natalana naman subong nga bulan sang Oktubre ang Breast Cancer Awareness Month sa diin tinutuyo sang amo nga aktibidad nga ganyaton ang publiko nga mangin aligmat sa amo nga balatian kag hatagan sang suporta ang mga kababainhan nga nagasupreher sang amo nga balatian.
Nagpahanumdom naman ang natungdan nga ipabilin ang ikaayong-lawas kag amligan ang kaugalingon agud nga makalikaw sa amo nga balatian.
Interviewed by Bombo Sunnie Mae Constantino Batencila
