Nagapabilin nga mapag-on ang supply sang bugas sa Pilipinas sa pihak sang tensyon sa Middle East nga mahimo nga makaapekto sa pangkalibutanon nga trading, sandig sa report sang National Food Authority (NFA).
Suno kay NFA Administrator Larry Lacson, may hawid ang ahensya nga 2.6 million ka sako sang milled rice. Sa amo nga numero, 600,000 ka sako ang nakatigana para sa mga nagdaog sa auction, samtang 2 million ka sako ang para sa publiko kag pagkinahanglan sang gobyerno. Kun ilakip ang mga humay nga wala pa nagaling, nagalab-ot sa 8 million ka sako ang kabug-usan nga stock, nga katumbas sang 10.3 ka adlaw nga supply para sa pungsod.
Padayon man nga ginpagwa ang dalagkuan nga bulto sang bugas sa idalom sang Benteng Bigas program kag para sa nagkalain-lain nga ahensya sang gobyerno, apang ginasigurado sang NFA nga magapabilin nga sobra sa 10 ka-adlaw ang buffer stock para sa ano man nga emergency.
Sa subong, nagasalig man ang pungsod sa lokal nga ani kag stock sang mga rice trader para mas mapabilin ang mapag-on nga suplay.
