Isa ka pinasahi nga selebrasyon ang ginhimo sang tag-iya sang Granville’s Coffee sa Quesnel, British Columbia, nga si Ted Martindale sang ginsaulog niya ang iya ika-80 nga kaadlawan paagi sa paghimo sang isa ka higante nga 17 x 17 feet nga carrot cake.
Si Martindale, nakig-angot sa nagkalainlain nga lokal nga panaderya sa paghimo sang cake nga naggamit sang kapin sa 1,760 ka libra sang mga karot, 700 ka libra sang mantikilya, linibo ka itlog, kag halos 2,000 ka libra sang icing.
Suno kay Martindale, naglawig sang masobra isa ka bulan ang paghimo sang 430 ka mga indibidwal nga cake nga gintingob agud maporma ang higante nga carrot cake.
Ang cake ginserbe sa iya birthday party sa lokal nga senior’s center.
Ginabanta nga nagalab-ot sa 6,044 ka libra ang kabug-aton sang cake ni Martindale, apang kinahanglan pa nga repasuhon sang Guinness World Records ang ebidensya antes ini opisyal nga kilalahon bilang isa ka bag-o nga rekord.
