Naga-koordinar na ang mga katapo sang Capiz Coast Guard sa Philippine Ports Authority (PPA) agud magtukod sang mga tikang sa dugang nga seguridad para sa mga pantalan.
Sa interview sang Bombo Radyo kay Comm. Edison B. Diaz, Station Commander sang Capiz Coast Guard, ginpahayag sini nga bilang parte sang ginatawag nga basic routine sa mga pantalan, nagapanguna nga in-charge diri amo ang Philippine Ports Authority (PPA) kag ang Coast Guard naman, nagabulig man sa pagpatigayon sang inspection sa mga Cargo Vessels kag mga bagahe sang pasahero.
Dugang pa sini nga sa pag-tsekyar naman sang mga bagahe sang pasahero sang mga Roro bus pag-abot sa port area, ang mga pasahero na ang ginapapanaog sang mga otoridad sa bus kag ginapasaka nalang ang k9 personnel agud mag-inspection sa mga bagahe.
Sa isyu naman nga may kaangtanan sa narekober nga marijuana dried leaves sa probinsya, ginakabig ini bilang challenge sang mga ini kun ano pa nga mga tikang ang pagahimuon agud masiguro ang hugot nga seguridad sa mga pantalan.
Sa karon, naga-koordinar na ang mga katapo sang Capiz Coast Guard sa PPA kag ginatun-an na ang pagahimuon kag igadugang nga mga tikang nga igapatuman para sa seguridad sa mga pantalan.
