ROXAS CITY – Magapangatubang sa kaso nga syndicated estafa ang ginbansagan investment scam queen mangin ang iya mga recruiters sa FOREX investment scheme sa probinsiya sang Capiz.
Natalana nga magpadulong subong nga adlaw sa National Bureau of Investigation (NBI) ang grupo sang mga indibidwal nga nabiktima sang leader sang scam nga si Lourdes Bulaqueña Baarde nga anay empleyado sang Bureau of Internal Revenue (BIR).
Magluwas kay Baarde, pagapasakaan man sang mga complainants sang kapareho nga reklamo ang lima ka mga leaders nga nagserbi recruiters ni Baarde.
Bitbit sang mga complainants ang mga dokumento nga magapamatuod nga napaslawan si Baarde nga mabalik ang ginpasalig sini nga 20-percent nga tubo gikan sa ila gin-invest nga kwarta kag ang gin-isyu sini nga post-dated check nga nagtalbog.
Sa karon nagalab-ot na sa 73 ang numero sang mga propesyunal nga nagtuhaw kag ginreklamo ang nasambit nga investment scam leader.
