ROXAS CITY, CAPIZ – Nagapanguna ang probinsya sang Capiz sa may pinakamataas nga percentage sang teenage pregnancy sa Western Visayas.
Sa interview sang Bombo Radyo Roxas kay Roilo Vincent Laguna, Program Officer III kag OIC-PPO IV sang Commission on Population and Development Region 6, ginakahangaw-an subong ang datos angut sa nagadamo nga kaso sang teenage pregnancy sa rehiyon.
Suno kay Laguna, base sa record sang Philippine Statistics Authority (PSA), ang Capiz ang nagapanguna pag-abot sa porsyento sang timprano nga pagbusong sang mga kababainhan nga ara sa lamharon nga edad samtang pag abot sa numero, ang Iloilo Province ang may pinakamadamo nga kaso sang teenage pregnancy.
Dugang pa sang natungdan, pila sa mga nagapanguna nga rason sang timprano nga pagbusong amo ang pamilya, impluwensya sang komunidad, unprotected sex, kag hilway nga access sang kabataan sa internet.
Pahayag pa ni Laguna, sandig sa record sadtong 2023, narekord ang pinakabata nga kaso sang pagbusong sa edad nga 11-anyos.
Ginpasalig man sini nga padayon ang pagpatuman sang nagkalain-lain nga programa sang Commission on Population and Development Region 6 agud mapunggan kag mabuhinan ang pagdamo sang kaso sang teenage pregnancy.
Nagpasalamat si Laguna sa suporta sang mga partner agencies kasubong sang Department of Health (DOH), Department of Education (DepEd), mangin sang media kag komunidad.
Suportado man sang Commission on Population and Development Region 6 ang Comprehensive Sexuality Education sang DepEd nga tinutuyo nga maghatag sang insakto nga ihibalo sa mga kabataan kag responsable nga desisyon.
Mensahe ni Laguna nga ang adolescent pregnancy ang indi katapusan sang tanan kag may mga pamaagi agud mabuligan ang mga kabataan nga naapektuhan sini. Kadungan sini, nagapanawagan man ang natungdan sa tanan nga mga ginikanan, LGUs, organisasyon, kag komunidad nga magbuligay agud masolusyunan ang nasambit nga problema.
Interviewed by: Bombo Lynd-C Bade
