ROXAS CITY – Naglab-ot sa 14 ang kabug-usan nga numero sang mga nabiktima sang palupok sa probinsya sang Capiz matapos ginselebrar ang paskwa kag bag-ong tuig sang damlag lang.
Sa interview sang Bombo Radyo Roxas kay Mr. Joeffrey Espiritu, Development Management Officer IV sang Department of Health – Capiz, ang 14 ka mga biktima sang palupok ang ginalakipan sang (3) nga nagikan sa syudad sang Roxas, tig-duha (2) sa banwa sang Jamindan, Pontevedra kag Sigma samtang tig-isa (1) naman sa banwa sang Panay, President Roxas, Ivisan, Mambusao kag Dumarao.
Nagapati man ini nga nangin epektibo ang kampanya nga Iwas Paputok sang Capiz Provincial Health Office bangud nagnubo sang 44% ang mga nabiktima sang palupok subong nga tuig ikumparar sang nakaligad nga tuig kun sa diin nakapagkit sang 25 ka mga biktima.
Suno kay Espiritu nga paso lamang ang naangkon sang 14 ka mga biktima sang palupok kag wala sang may nautod nga tudlo sang kamot apang may yara sang apat ka mga biktima sang eye injury bangud sa pagpalupok sang buga.
Ginpahayag man sini nga 12 diri ang ginakabig active ukon mismo sila ang nagpalupok samtang (2) ang passive ukon nadalahig lamang sa pagpalupok sang palupok.
Lubos man ang pagpasalamat ni Espiritu sa tanan nga nangin kaupod sang Department of Health – Capiz sa kampanya agud maselebrar sang matalunsay ang Bag-ong Tuig 2021.
Dugang pa sini nga nangin disiplinado kag maalam ang mga pumuluyo agud sundon ang ginpatuman nga programa sang DOH-Capiz nga nagresulta sa manubo nga kaso sang mga nabiktima sang palupok.
