CAPIZ – Nagpahanumdum kag nagpakigbahin sang pila ka mga tikang kag palatandaan ang katapo sang Capiz Provincial Health Office sa publiko kung paano malikawan ang sakit nga Ketong ukon mas kilala sa tawag nga Aro kadungan sa pagselebrar sang World Leprosy Day.
Sa interview sang Bombo Radyo kanday Mr. Adrian C. Sta. Maria, LPT, ang Health Education and Promotion Officer, Mr, Leo C. Biclar, RMT kag Medtech III kag Mr. Ayr Altavas, ang Public Information Officer sang Capiz PHO, ginsiling nga ang ketong ukon aro isa ka kroniko nga sakit nga makatalapon.
Dala ini sag bacillus nga Mycobacterium leprae ukon Mycobacterium lepromatosis.
Ang mga sintomas sang nasambit nga sakit nagakatabo sa sulod sang 1 ka tuig apang posible pa nga magdugay sang tubtob 20 tuig kag masobra pa.
Suno diri, nagaapekto ini sa panit sang tawo, mata, ilong, nawong kag mga nerve sang lawas.
Pananglitan nga naapektuhan ang isa ka indibidwal sang amu nga sakit masami nga nagasugod ini sa panit kung sa diin makaeksperyensya sang kaangay puti kag pula nga pantal kag sa ulihi nangin nodule ukon bukol-bukol.
Kadungan sa pagbag-o sang panit makaeksperyensya man sang pagka-alay sang braso, kamot, batiis, siki kag nawong.
Magluwas diri, ang buhok sang pasyente posible pa nga maanot.
Mahimo man ini nga makalaton pinaagi sa pagsinghot sang droplets ukon magagmay nga lawas nagikan sa pasyente subong man ang masami nga pagpakighinala sa may sakit.
Pila sa mga palatandaan agud malikawan ini amu ang;
*Likawan nga magamit sang mga kubyertos nga ginagamit sang pasyente
*Mangin preparado nga magbisita ukon magpadulong sa lugar nga may mga kaangay nga kaso
*Gilayon nga ipabulong ang miyembro sang pamilya nga apektado sang amu nga sakit.
Matandaan nga ang M. lepromatosis isa ka bag-o nga mycobacterium kung sa diin isa ka makamamatay nga diffuse lepromatous leprosy sadtong 2008.
