ROXAS CITY -Nagakahangawa sa iya kondisyon ang Capizeña Overseas Filipino Worker (OFW) matapos nagpositibo sa covid-19 disease ang duha ka mga kaupdanan sini sa trabaho sa pungsod Kuwait.
Ginpahayag ni Lyn-Lyn, Overseas Filipino Worker sa pungsod Kuwait kag residente sang Roxas City, nga nakabatyag na ini sang sintomas sang covid-19 disease matapos nga naka close contact ang kaupod sini nga kabulig nga ethiopian national nga nagpositibo man sa covid-19 disease.
Nagapati si Lyn-lyn nga posible nakuha sang kaupod sini nga ethiopian nga kabulig sa napatay nga kaupod nga head driver ang COVID-19.
Suno kay Lyn-lyn nga antes natukiban nga nagpositibo sa covid-19 disease ang napatay nga driver, masami nga ginadul-ongan sang pagkaon sang upod sini nga ethiopian nga kabulig ang nasambit nga driver.
Nahibaluan nga antes pa nagpositibo sa covid-19 ang nasambit nga ethiopian, nakaangkon na sang close contact kag naistorya pa ini sang Capizeña OFW.
Nabalaka lamang ini sa karon bangud nakabatyag na ini sang pagpalanakit sang tutunlan, pagsakit ang ulo kag kakapoy sang kalawasan.
Sa karon tuman ang pagpangamuyo ni Lyn Lyn samtang nagahulat sa resulta sang test.
Nahibaluan pa nga ginpaidalum na ini sa isolation sa sulod sang iya nga hulot.
