ROXAS CITY – “Manami ang snow, but indi mo paggustuhon nga mag-istar sa snow”
Kaangay nga nagapuyo sa isa ka freezer, ang pang-adlaw-adlaw nga pangabuhi sang isa ka Capizeña, sa karon nga nagaeksperyensiya sila sang snowstorm.
Sa interview sang Bombo Radyo kay Bombo International Correspondent Pang Ga, direkta sa Flagstaff, Arizona, USA, suno diri nga nagadangat sa 31°F ukon makabig nga ‘freezing point’ ang ila temperatura.
Suno pa diri nga kinahanglan nila nga maggamit sang mga teknolohiya, kaangay sang snow melter, agud maghagan-hagan ang kalamig nga ila nabatyagan.
Ginpakigbahin man sang BINC nga taga-hawak sini ang niyebe nga nagapalibot sa ila balay, kun sa diin ginagamitan pa nila sang bulldozer agud gid lamang makuha ang nagatambak nga snow sa ila balay.
Suno man diri nga sa iya 8 katuig nga pagtenir sa nasambit nga lugar, subong palang ini nakabatyag sang kulubaan nga snowstorm.
Apang, nagapasalamat man ini bangud sa pihak sini, natigayon nga makasulod ini sa iya trabaho adlaw-adlaw.
Nahibaluan nga temprano nagsugod ang winter season sang December 21, kag magadugay tubtob sa bulan sang Abril, nga pagabuslan naman sang spring season.
