Daku ang kalipay sang isa ka Capizeño pagkatapos ini malakip sa top 10 passers sang October 2025 Fisheries Licensure exam
Siya amo si Christian Jimenez, 22-anyos kag pumuluyo sang Barangay Inzo Arnaldo Village, Roxas City.
Sa interview sang Bombo Radyo kay Jimenez, iya ginpahayag nga indi nangin madali ang iya mga inagyan antes nalab-ot ang nasambit nga kadungganan.
Suno kay Jimenez, nangin isa siya ka working student agud makabulig sa iya nga ginikanan sa pagsuporta sang iya nga pag-eskwela.
Pahayag pa niya, apisar indi niya gusto ang kurso nga Fisheries sang una apang sang ulihi natun-an niya man ini nga palanggaon bangud nagapati siya nga ang ini nga kurso ang magatib-ong sa dungog sang Capiz bilang “Seafood Capital of the Philippines”.
Dugang pa sang natungdan, indi rason ang kapigaduhon sa pag-abot sang mga handum sa kabuhi sang isa ka tawo.
