ROXAS CITY – Patay ang isa ka chief tanod matapos nga naluthangan sang isa ka barangay kagawad sa isa ka binaylihan sa Barangay Quinabonglan, Maayon, Capiz.
Ginkilala ang napatay nga biktima nga si Fernando Dagandan, 49 anyos, chief tanod kag residente sang nasambit man nga lugar.
Suno kay Police Corporal Vincent Dumagpi, imbestigador sang Maayon Municipal Police Station, nagtuyo lamang nga magtambag ang biktima sa komosyon nga ginkadalahigan sang suspek nga si Eljohn Dagandan.
Bilang chief tanod sang barangay, nagresponde ang biktima apang dimalas nga naluthangan ini sang suspek nga naigu sa iya nga ulo.
Gindala pa sa Bailan District Hospital ang biktima apang gindeklarar nga dead on arrical sang attending physician.
Madasig nga nagpalagyo ang suspek matapos ang krimen apang naaresto man ini sang mga pulis sa iya nga balay kun sa diin iya ginsungka ang .45 calibre nga armas nga gingamit sa pagluthang sa biktima.
