ROXAS CITY – Indi pa mapat-ud sang Chairman sang Committee on Fisheries and Aquatic Resources sang Sangguniang Panlungsod kun nagsugod na ang pag-harvest sang diwal sa mga kalalawran nga sakup sang siyudad.
Ini ang ginpahayag ni City Councilor Moreno Gonzaga sang mainterview sang Bombo Radyo.
Suno kay Gonzaga nga nakabaton ini sang impormasyon gikan kay Mr. Rizaldy Astrolabio, Regulatory Officer sang City Agricultures Office nga nagsugod na ang pagharvest sang diwal sang tinalikdan nga Lunes, Setyembre 7.
Apang suno kay Gonzaga nga indi pa ini mapat-ud nga impormasyon bangud wala pa sang ginpaguwa nga Executive Order si Roxas City Mayor Ronnie Dadivas nga may yara sang open season sa pagharvest sang diwal.
Gindugang pa ni Gonzaga nga madamo sang mga negosyante nga nagasekyar sang permit sang transport sa Bureau of Fisheries and Aquatic Resources ukon BFAR apang wala ini sila ginahatagan sang ahensiya bangud wala pa sang may nauyatan nga executive order nga open season na ang nasambit nga ahensiya.
Ginpahayag man ni Gonzaga nga kun may yara na gid man sang open season sa pag-harvest sang diwal, kinahanglan nga ipahibalo sa publiko agud masugoran man sang mga magagmay nga mga negosyante partikular na ang mga naganegosyo sang diwal.
Suno kay Gonzaga nga indi ini patas bangud may yara sang mga namutikan nga mga indibidwal nga nagapalusot sang diwal sa iban nga mga kaprobinsiyahan.
Samtang, luyag man sini usisaon kun may yara na sang Executive Order nga ginpaguwa ang siyudad nga open season na sa pagharvest sang diwal agud mamonitor ang mga nagapalusot nga mga indibidwal sa iban nga mga kaprobinsiyahan.
Mahibaluan nga kapin sa 2,000 kilos sang diwal ang na-harvest sa Barangay Punta Cogon, Roxas City.
