PRESIDENT ROXAS, CAPIZ – Gin-athag ni Commission on Elections (Comelec) Chairman George Erwin Garcia nga mahimo ma-apply ang Supreme Court (SC) ruling sa President Roxas, Capiz sa tion nga madesisyonan na ‘with finality’ ang kaso batuk kay Mayor Receliste Escolin.
Ang bag-o nga desisyon sang Korte Suprema nagasiling nga mahimo ipatuman ang rule of succession sa mga kaso lakip na ang naglapaw sa three-term limit.
Sa tion nga mabakantehan ang mayoralty seat, sundon ang SC ruling sa diin si Vice Mayor Jhefferson Pastrana ang magapungko nga Mayor kag indi si former Sangguniang Bayan member Bart Locsin.
Matandaan nga si Locsin ang ika-duha sa may mataas nga numero sang boto sa pagka-alkalde sang May 2025 elections.
Nahibaluan nga ginapanindugan sang Comelec En Banc nga nakaserbe na sang tatlo ka sunod-sunod nga termino bilang alkalde si Escolin.
Gin-ako ni Garcia nga ang kaso ni Escolin ang wala pa madesisyonan ‘with finality’ bangud sa legal nga mga proseso nga ginahimo sang duha ka mga kampo.
Naka-file naman ang kampo ni Locsin sang intervention batuk kay Escolin kag nagpanawagan ini sa Comelec En Banc nga i-proklamar siya bilang winning candidate.
Sang Pebrero 18, 2026, nagmandu ang Comelec En Banc kay Escolin nga magsabat sa intervention plea nga gin-file ni Locsin.
Una na nga ginpahayag ni Escolin nga ang iya termino bilang alkalde sang banwa ang na-utod sang 90 ka adlaw bangud sa suspension nga gindagdag sa iya sang Office of the Ombudsman sang 2024.
via The Capiz Times
