Ginsikway sang Commission on Elections (Comelec) ang panukala nga i-adopt ang hybrid poll system para sa 2025 midterm elections.
Paathag ni Comelec Chairman George Erwin Garcia, kinahanglan sang layi agud maipatuman ang poll body ang hybrid system kag dugang pa sini tagatuman lamang sang layi ang komisyon.
Sa idalom sang hybrid system, manual ang pagboto kag pag-isip sang boto sa mga precinct level samtang automated ang transmission kag canvassing sang mga resulta.
Apang, sa pagtuon sang Comelec, nagaguwa nga sa idalom sang hybrid system, abuton sang 3 adlaw para sa pag-isip pa lamang sang mga boto sa mga presinto nga magatuga sang mga delay sa halalan.
Ginhimo sang poll body chief ang pahayag sa tunga sang panawagan sang koalisyong Alyansa ng Nagkakaisang Mamamayan (ANIM) para sa hybrid elections bangud sa ginapahayag nga kawalan sang transparency sa automated system.
