Madugangan pa ang nagatumpok nga kaso ni Bamban, Tarlac Mayor Alice Guo kun i-file na sang Commission on Elections (Comelec) ang election offense case batuk sa iya.
Ini ang kasunod sang iya pagbinutig kag pag-deklarar nga isa siya ka Filipino citizen sang nag-file ini sang Certificate of candidacy (COC) sang 2022 elections.
Suno kay Comelec Chairman George Erwin Garcia, ang pagpakuno-kuno nga isa ka Filipino citizen ang maathag nga paglapas sa Omnibus Election Code.
Pahayag pa sini, ginahulat na lamang sang Comelec ang desisyon sang Office of the Solicitor General sa kaso ni Guo antes ini nga mag-file sang kaso-kriminal.
Ginpasalamatan man sini ang Philippine Statistics Authority kag ang National Bureau of Investigation bangud sa ila nangin findings angut kay Guo.
Una na nga ginpahayag sang Office of the Solicitor General (OSG) nga gilayon sila nga maga-file sang quo warranto case batuk kay Guo matapos ginkumpirmar sang National Bureau of Investigation nga positibo ang iya fingerprints sa Chinese national nga si Guo Hua Ping, nga kun sa diin, nahibaluan nga isa lang sila ka persona.
Matandaan nga sang damlag lang, nagpasaka man ang PNP Criminal Investigation and Detection Group kag ang Presidential Anti-Organized Crime Commission sang non bailable qualified human trafficking charge batuk kay Mayor Guo bangud man sa illegal nga Pogo hub sa Bamban.
Matandaan nga una na man nga nag-file ang Department of the Interior and Local Government sang administrative complaints batuk kay Guo kag iban pa nga municipal officials sa Bamban.
Ang ginpasaka sa Office of the Ombudsman nga administrative complaints pending resolution ang nagalakip sang grave misconduct, serious dishonesty, gross neglect of duty kag conduct prejudicial to the best interest of the service.
