ROXAS CITY – Nagapabilin nga ginabulong sa Mambusao District Hospital ang 29-anyos nga conductor sang isa ka bus company matapos nga aksidente nabunggoan ang ginamaneho nga motorsiklo sang salakyan sa Barangay Bilao, Sapian, Capiz.
Ginkilala ang biktima kay Joei Olanga sang Barangay Poblacion, Sapian.
Base sa inisyal nga imbestigasyon sang Sapian PNP nga magaliko na kuntani ang biktima apang aksidente na lamang ini ginbungguan sang salakyan nga ginamaneho ni Michael Martinez 41-anyos sang Barangay Linayasan, Altavas, Aklan.
Bangud diri, nag-angkon sang pilas sa lawas ang biktima nga gilayon gindala sa ospital agud madapatan sang nagakaigo nga pagbulong.
Samtang, yara na karon sa kustodiya sang Sapian PNP ang motorsiklo kag salakyan para sa nagakaigo nga disposisyon.
