ROXAS CITY – Dead on arrival sa ospital ang 39-anyos nga construction worker matapos nga ginaalegar nalumos sa suba sa Barangay San Roque, Dumalag, Capiz.
Ginkilala ang biktima nga si alyas ‘Dodoy’ residente sang nasambit nga lugar.
Sa impormasyon nga nakuha sang Bombo Radyo sa Dumalag Municipal Police Station, ginapahayag nagpaligo sa suba ang biktima ginabulubanta 1:00 sang hapon.
Apang makaligad ang pila ka oras, wala sa gihapon nakapauli ang biktima tubtob nadesisyunan sang mga himata sini nga i-report ini sa kapulisan pasado 5:00 na sang hapon.
Gilayon nga nagresponde ang mga katapo sang Dumalag Emergency Rescue Team kag nagpatigayon sang search and rescue operation.
Pasado 6:00 sang gab-i, narekober sang rescue team ang lawas ni alyas ‘Dodoy’ kag gintinguhaan nga madala sa ospital apang ginbawian ini sang kabuhi.
Ginaalegar yara sa impluwensya sang makahulubog nga ilimnon ang biktima sang nagpaligo ini sa suba.
Sa karon, yara na sa punerarya ang bangkay sang biktima.
