Gin-ako sang social media personality nga si Jack Argota nga peke ang kopya sang medical records ni Presidente Ferdinand Marcos Jr nga iya gin-share online.
Nagpangayo man ini sang pasaylo kag ginpahayag nga gina-ilog lang niya ang iban nga personalidad sa social media nga nag-share sang amo man nga dokumento.
Matandaan nga kahapon nga adlaw, isahanon nga nag-atubang si Argota sa National Bureau of Investigation (NBI)–Cybercrime Division agud magsabat sa ginpadala nga subpoena kag magpaathag sang natabo.
Suno kay NBI Director Lito Magno, nagsunod si Argota sa ginpadala nga subpoena kag naghatag sang iya pahayag.
Samtang, sa video nga gin-upload sa social media, nagpasalamat si Argota kay Magno kag sa mga opisyal sang NBI.
Sa subong, wala pa sang dugang nga detalye nga ginpaguwa ang mga otoridad angut sa resulta sang hearing, apang ginalauman nga magapadayon ang imbestigasyon sa masunod nga mga inadlaw.
