Naglab-ot sa kapin P5.7 bilyon ang nakolekta sang Communist Party of the Philippines-New People’s Army (CPP-NPA) halin sa pagpanghuthot ukon extortion halin 2016 tubtob 2022, suno sa pahayag sang Philippine Army’s 3rd Infantry Division (3ID).
Sa interview sang Bombo Radyo kay Colonel Erwin Rommel Lamzon, Chief sang Public Affairs Office sang 3rd Infantry Division, iya ginpahayag nga ang mga negosyante ang nagapanguna nga gina-target sang grupo para sa pagpangolekta sang ginatawag nga “revolutionary taxes.”
Suno kay Lamzon, dako nga kantidad ang halin sa mga negosyo sa telekomunikasyon, agrikultura, konstruksyon, pagmina, kag mga multinational nga korporasyon. Kalakip man sa mga biktima sang pagpanghuthot ang mga probado nga indibidwal, mangunguma, magagmay nga negosyante kag, mga politiko ilabi na sa tion sang kampanya.
Dugang pa nya, base sang mga nangin testimonya sang mga anay rebelde kag mga report sang intelligence, naggamit ang Communist Party of the Philippines-New People’s Army (CPP-NPA) sang apat nga nagapanguna nga pamaagi sang pagpangolekta nga ginakalakipan sang:
- Terrorist Finance Networking (TFN) nga ginapatigayon sa internasyonal nga lebel agud makakuha sang suporta kag pondo para sa pagpakigbato sa gobyerno.
- Rebolusyonaryong Buwis sa Kaaway na Uri (RBKU) nga direkta nga naga-target sa mga negosyo kag pulitiko.
- BUTAW ukon ang mandatory nga kontribusyon halin sa mga myembro kag supporters kag masami pa nga pinilitay.
- Underground Mass Organization (UGMO) dues ukon ang koleksyon halin sa mga kaalyado nga grupo sang Communist Party of the Philippines-New People’s Army (CPP-NPA).
Pahayag pa sang natungdan, padayon ang operasyon sang military agud dalayon na nga mawakasan ang presensya sang Communist Party of the Philippines-New People’s Army (CPP-NPA) sa mga probinsya sang Western kag Central Visayas.
Interviewed by Bombo Sunnie Mae Constantino Batencila
