Padayon sa karon ang ginakasa nga imbestigasyon sang Department of Agriculture (DA) angut sa ginaalegar paghikog sang mga mangunguma nga bangud sa manubo nga purchase price sang ila humay.
Pagkumpirma ni DA Assistant Secretary for Special Concerns and Official Development Assistance kag Spokesperson Engr. Arnel De Mesa, matuod kag kumpirmado nga may napatay apang iya ginhatagan pagtamod nga indi ang pagbakal sang bugas sa manubo nga presyo.
Suno sa iya, indi insakto ang mga nagapalapta sang espekulasyon angut sa kamatayon sang nasambit nga mga mangunguma rason nga nagakadapat nga klaruhon.
Naghingyo man ang departamento nga pabay-an danay nga magluksa ang pamilya sang mga mangunguma kag ang imbestigasyon nga gintugyan sang departamento sa National Bureau of Investigation (NBI) nga ipadayon.
Samtang ginpasalig naman sang tagpamaba nga ginahimo nila ang ila masarangan agud mabuligan ang mga lokal nga mangunguma agud maproteksyunan sila kag mangin ang ila palangabuhian.
Suno sa iya, ginapunggan lang sila sang mga polisiya kag wala ginalauman nga mga sirkumstansya, rason nga may mga delay.
Sa subong, padayon nga ginasunod sang departamento ang ila mandato kag ginapasiguro nga wala nagapabaya ang ila ahensya sa pagbulig sa mga lokal nga mangunguma ilabi na sa pagbakal sang bugas sa ila.
