Nagdangat na sa 188 ang napatay sa Bagyong Tino, samtang 135 pa ang missing kag 96 ang pilason suno sa Office of Civil Defense (OCD).
Base sa report sang National Disaster Risk Reduction and Management Council ukon NDRRMC, ginpahayag ni OCD Deputy Spokesperson Diego Mariano nga padayon pa nga gina-verify ang numero sang casualties kag mahimo nga magbag-o.
Pinakamadamo nga fatalities ang na-report sa probinsya sang Cebu nga naglab-ot sa 139, matapos ini naka-eksperyensya sang mabaskog nga pag-ulan kag pagbaha tuga sang bagyo.
Samtang 24 ang napatay sa Negros Occidental, 9 sa Negros Oriental, 6 sa Agusan del Sur, 3 sa Capiz, 2 sa Southern Leyte, kag tig-isa sa Antique, Iloilo, Guimaras, Bohol, kag Leyte.
Sa 135 nga missing, ang Cebu sa gihapon ang may pinakadamo nga may 79, ginasundan sang Negros Occidental nga may 39, kag Negros Oriental nga may 17.
Base sa situation report sang NDRRMC, naglab-ot sa 2,258,782 ang apektado sang bagyo sa diin 397,634 diri ang yara pa sa evacuation centers.
Naglab-ot naman sa ₱10.6 million ang halit sa agrikultura ₱6.3 million naman sa imprastraktura.
Narekord naman ang 9,585ka mga balay ang nahalitan — 9,321 diri ang partially damaged kag 264 ang totally damaged.
