ROXAS CITY – Ginrekomendar sang Capiz Schools Division Superintendent nga indi maghiwat sang limited face to face classes sa probinsya tubtob nga may pagpamahog sang COVID-19.
Ini ang ginpahayag ni Dr. Salvador Ochavo, Jr., sang mainterview sang Bombo Radyo.
Suno diri, nga indi nila luyag nga ibutang sa risgo ang ikaayong lawas sang mga manunudlo, staff kag learners, ilabi na nga kadam-an sa mga learners ang minors kag indi pa bakunado, dugang pa diri nga sa karon may bag-o naman nga variant sang nasambit nga virus nga amu ang Omicron.
Apang, suno diri nga kun ma-stabilize ang kaso sang COVID-19 sa pungsod, posible sa sina nga tion magabaylo sila sang sabat, apang sa karon, wala sila nag-apply for limited face to face classes sa Capiz.
Samtang, ginklaro man sang Schools Division Superintendent nga wala sang memorandum nga mandatoryo ang pagpabakuna sa mga manunudlo, kundi advisory gid lamang.
Ginarespeto suno diri sang DepEd ang kinamatarong sang tagsa-tagsa ka mga manunudlo.
