ROXAS CITY – Preparado na ang Department of Education – Roxas City Division sa pagbukas sang klase sa subong nga School Year 2025-2026.
Sa interview sang Bombo Radyo kay Ms. Yzarda Claudette Ballera, Division Information Officer sang DepEd Capiz, iya ginpahayag nga opisyal nga magaumpisa ang klase sa Hunyo 16 kag nagabaton na sila subong sang pre-registration para sa mapa-enroll.
Suno kay Ballera nga antes ang pagbukas sang klase may patigayunon nga Brigada Eskwela sa Hunyo 9 tubtob 13 nga preparasyon sang mga buluthuan sa opening sang klase.
Gina-encourage man sini ang mga ginikanan kag mga estudyante nga magbulig sa pagpanglimpyo sa mga buluthuan agud mangin maayo ang pagbukas sang klase.
Sa pihak nga bahin, may tatlo ka buluthuan sa Capiz nga nalakip sa pilot testing sang bag-o nga Senior High School Curriculum ini amo ang mga masunod: Ivisan National High School, Florentina B. Degala National High School sa Maayon kag Pontevedra Christian School.
– With a report from: Bombo Jessa Mae De Los Santos
