ROXAS CITY – Positibo ang Department of Education Region 6 nga makuha sang delegasyon sang Western Visayas ang kampeonato sa Palarong Pambansa 2025.
Sa interview sang Bombo Radyo kay Mr. Hernani Escullar Jr., Spokesperson sang DepEd Region 6, iya ginpahayag nga handom sang rehiyon nga magpanguna sa subong nga Palaro bangud nagapangatlo lamang ini sang tinalikdan nga tuig.
Suno kay Escullar, may 965 tanan ka mga delegates ang Western Visayas kun sa diin ginakubug-usan ini sang 605 athletes, 87 coaches, 24 assistant coaches, 40 chaperons, kag 209 members sang technical working committees.
Pahayag niya, natalana nga maghalin ang delegasyon sang Panay, Guimaras kag Negros sa Mayo 17 kag ginabanta nga maabot sa Ilocos Norte sa Mayo 19.
Ini naman ang ulihi nga pag-updanay sang Western Visayas kag Negros Occidental para sa Palarong Pambansa.
Gani pinasahi subong ang DepEd Region 6 bangud may yara sang duha ka mga regional directors nga nagapangalagad kag nagabulig sa mga delegasyon sang Western Visayas.
Ini amo sanday DepEd 6 OIC Regional Director Christito Eco, CESO III kag Dr. Ramir Uytico, CESO III ang Regional Director sang Negros Island Region.
Dugang sang natungdan, naghalin sa National Capital Region bilang Assistant Regional Director si OIC-RD Eco kag mahimo nga mangin bentaha ini para sa mga atleta sang Rehiyon 6.
Nahibaluan nga ang Ilocos Norte ang host subong sa Palarong Pambansa kag ang defending champion amo ang National Capital Region.
