ROXAS CITY – Nagapanindugan ang Obstetrician-Gynecologist ukon OB Gyne sang isa ka 30 anyos nga misis nga ginbawian sang kabuhi kaupod ang ginabusong sini nga gin-ubra sini ang nangin responsibilidad niya bilang doktor sa pagmonitor sa kondisyon sang iya kliyente apisar nga duha lamang ka beses nga nakapapre-natal ang biktima nga si Mary Chris Baylen sa klinika sang nasambit nga doktor.
Ini matapos ang nagalapta nga alegasyon nga ginabasol sang Bailan District Hospital ang nasambit nga doktor sa natabo sa biktima.
Suno kay Dra. Marrietta Hao, wala sang kamatuoran nga nagtawag sa iya ang Bailan District Hospital agud magpahibalo nga alas 3 sa kaagahon sang Oktubre 25 na nakapadulong sa nasambit nga ospital ang biktima rason nga gin-atake ini sang tuman ka kalain nga pamatyag kag kabangdanan man nga naulihi ini nga masaylo sa Capiz Doctor’s Hospital sa syudad sang Roxas.
Sa baylo nga ang nasambit nga pribado nga ospital pa mismo ang makapanawag kay Hao agud ipahibalo kun mahimo nga makapadulong ang doktor sa ospital agud magpaanak sa nasambit nga biktima.
Suno diri nga madasig man ini nga nagpadulong sa amo nga ospital kag gilayon nga ginpaanak ang nasambit nga biktima apang wala na sang kabuhi ang lapsag nga babayi sang tion nga nakaguha na ini.
Madasig man nga ginpadulong sa ICU sang nasambit nga pribado nga ospital ang biktima apang ginbawian man ini sang kabuhi.
Nagapati si Hao nga patay na ang anak sang nasambit nga biktima sang tion nga yara pa lamang ini sa Bailan District Hospital.
