ROXAS CITY – Nagpursige ang tag-iya nga pangitaon ang iya trisikad nga nadula sa kilid sang merkado publiko sang Ivisan kun sa diin niya ini gina-park.
Ginkilala ang tag-iya kay Giro Acutillar 45-anyos kag residente sang Poblacion Sur banwa sang Ivisan.
Matandaan nadula ang iya trisikad sang Agosto 11 kadungan sa adlaw nga ginaalegar ginkawatan ang pila ka mga vendors sa sulod sang Ivisan Public Market kag ginapatihan gingamit bilang getaway vehicle sang mga kawatan nga tubtob sa karon wala pa nadakpan.
Suno kay tatay Giro ginaalegar may deperensya sa paminsaron ang nagkuha sang iya nga trisikad ba-se sa ginsiling sang mga nakakita.
Sa pihak nga bahin sandig kay tatay mapablotter siya kuntani sa Ivisan MPS alas 4:00 sang aga sang nadula ang iya trisikad apang sarado ang gate sini kag madulom pa sa sulod, gintinguhaan niya nga gintawag ang pulis nga yara sa sulod apang wala siya nabatian bangud ginapahayag naka-headset ini kag nagagamit sang cellphone rason nga wala siya nakita.
Bangud diri, nagdesisyon si tatay nga maglakat danay kag nagbalik sa police station alas 8:00 sang aga apang ginpangitaan siya sang authorization sang pulis nga siya nagapanag-iya sang trisikad rason nga naglakat siya sa liwat kag alas 11:00 sang aga na natigayon nga nakapa-blotter.
Nagbulig man suno diri ang Ivisan PNP sa pagpangita sang trisikad apang ikaisa lamang rason nga ginkadismaya niya gani ginpakamaayo nalang ni tatay Giro nga siya nalang ang magpangita bangud sa ini lang ang iya pangabuy-anan, tubtob sa nakit-an niya ini malapit sa crossing sang Brgy. Lanot sang tinalikdan nga Sabado takna 9:00 sang aga.
Nagapasalamat naman si tatay Giro bangud siya mismo ang nakakita sang iya trisikad kag magabalik na ini sa pagbiyahe.
