ROXAS CITY – Gindeklarar nga dead on arrival sa Mambusao District Hospital ang isa ka driver sang wing van nga napiskan sa ulo sang torque rod sang amo man nga salakyan sa Barangay Damayan sa banwa sang Sapian, Capiz.
Ginkilala ang biktima nga si Bryan Manapco, 36-anyos sang Barangay Payong-payong, Igcawayan, Cotabato City.
Nagaguwa sa imbestigasyon sang Sapian PNP, naaberya sa Barangay Damayan ang isa pa ka wing van nga ginamaneho sang kaupod ni Manapco nga si Jobert Garcia sang Barangay San Esteban, Pilar, Capiz.
Ginbuligan ni Manapco si Garcia nga makuha ang torque rod sa wing van nga naaberya agud kuntani nga ipakay-o apang aksidente nga napiskan sini si Manapco sa ulo.
Bangud sa kabaskugon sang pagpisik, nakaagum sang seryoso nga samad sa ulo si Manapco nga amo ang ginapatihan rasun sang iya nga kamatayon.
