ROXAS CITY – Arestado ang isa ka drug surrenderee sa ginkasa nga drug buybust operation sang mga katapo sang Philippine Drug Enforcement Agency (PDEA-Capiz) sa Mejorada Subdivision, Barangay Inzo Arnaldo Village, Roxas City.
Ginkilala ang nadakpan nga si Revy Rodwin Balgoma, 40 anyos, residente sang Barangay Cagay, sining siyudad.
Mahibaluan nga kalakip sa narekober sa suspek ang tatlo ka sachets nga may unod nga dalagko nga binulto sang shabu, P500 nga marked money, kag isa ka digital weighing scale.
Sa interview sang Bombo Radyo kay PDEA-Capiz provincial officer Agent Cornelio Espartero, ginpahayag sini nga madugay nila nga ginpaidalom sa monitoring ang suspek antes ginkasa ang nasambit nga operasyon.
Suno diri nga may mga kaupdanan pa si Balgoma nga ila man ginamonitor nga nagaduso sang ilegal nga droga.
Gindugang pa sini nga sa siyudad sang Roxas ang mga parokyano sang nasambit nga drug suspek.
Sa karon, nakaaresto na ang suspek kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
