TAPAZ, CAPIZ- Patay ang duha ka mga myembro sang Komiteng Rehiyon Panay nga ginabulubanta nagapang-edaron sang 30 tubtob 55 anyos sa nagluntad nga engkwentro sa tunga nila sang 82nd Infantry Battalion, Philippine Army sa Barangay Katipunan, Tapaz, Capiz sang Setyembre 20, 2025.
Sa interview sang Bombo Radyo kay 1Lieutenant John Bethoven Malana, Civil Military Operation Officer sang 82nd Infantry Battalion, Philippine Army, iya ginpahayag nga nakabaton ang ila nga talatapan sang report nagikan sa mga pumuluyo nga kaangay may pagpamahog sa ila nga pagpangilkil sang amo nga grupo.
Suno kay Malana, una nga nagpalupok sang armas-luthang ang bahin sang mga armado nga grupo nga ginabulunta yara sa pito ka bilog sa diin nga nagbalos man ang mga militar kag nagdugay sa 10-minutos ang amo nga engkwentro.
Kalakip sa mga narekober sa ginluntaran sang insidente ang duha ka yunit sang mga armas-luthang.
Dugang pa nya, ginatinguhaan na sa subong sang ila nga grupo nga mahibaluan ang identity sang duha ka mga biktima kag pormal nga ma-turnover sa pamilya.
Pahayag pa sang natungdan, ginasiguro sang ila nga hanay nga indi mag-untat myentras nga indi maubos sa pagbalik sa sabak sang gobyerno ang mga myembro sang makawala nga grupo.
Interviewed by Bombo Sunnie Mae Constantino Batencila
