Ginkumpirmar sang Chinese Embassy sa Manila sang Biyernes, Enero 23, nga duha ka Pinoy crew members ang napatay samtang isa ang kritikal nga napilasan matapos nga nagkulob ang Singaporean-flaged cargo vessel nga M/V Devon Bay sa Scarborough ukon Panatag shoal.
Base sa report nga ginshare sang Chinese Embassy, may kabug-usan nga 17 sa 21 ka mga Filipino crew members nga sakay sa cargo vessel ang na-rescue sang China Coast Guard samtang padayon pa ang pagpangita sa apat ka missing crew members.
Sa mga naluwas nga crew, 14 ang yara sa estable nga kondisyon, samtang isa ang padayon nga ginapaidalum sa emergency medical treatment.
Suno sa embahada, nagabyahe ang cargo vessel halin sa Pilipinas padulong sa Guangdong, China sang natabo ang insidente.
Dugang pa, gin-deploy na ang Chinese military aircraft agud magpatigayon sang aerial search sa lugar sang insidente, samtang duha ka CCG vessel malapit sa lugar ang gin-assign nga magkadto sa lugar agud magbulig sa rescue operation.
Pahayag pa, naga-organisar man ang maritime authorities sang China sang dugang nga rescue teams agud magpadulong sa lugar sang aksidente.
