SAPIAN, CAPIZ – Pilason ang duwa ka persona sang ginsungay sang baka ang ginasakyan nila nga motorsiklo sa Barangay Bilao, banwa it Sapian.
Sandig sa impormasyon nga nagikan sa Sapian Municipal Police Station, ginpahayag nga hinali na lang nakabuhi ang baka sa pagkahigot sini kag gulpi ginsungay sang baka ang motorsiklo nga gina subay ang amo dalan.
Bangud sini, natumba ang driver sang motorsiklo kag naapok ang angkas sini.
Ang wala na ginhingadlan nga driver sang amo nga motorsiklo ang nagapang-edaron sang 50-anyos samtang ang angkas sini nga babaye ang nagapang-edaron naman sang 47-anyos nga lunsay mga residente sa nasambit nga lugar.
Nag-angkon sang pilas sa magkatuhay nga parte sang lawas ang amo nga mga biktima kag gilayon naman nga ginpadangat sa malapit nga ospital para sa dugang nga pagbulong.
Sa karon, yara na sa istabli nga kondisyon ang nasambit nga mga biktima kag nagapadayon ang pagpabulong sa mga naangkon nga mga pilas.
