Nagtakup sa pangtatlo nga puwesto si Pinoy pole vaulter EJ Obiena sa Lausanne Leg of the Diamond League sa Switzerland.
Madinalag-on sini nga naabot ang 5.82 meters sa una nga attempt kun sa diin ka-patas sila sa ikatatlo nga puwesto sanday Sondre Guttormsen sang Norway kag Kurtis Marschall sang Australia.
Sila nga tatlo ang madinalag-on nga na-cleared ang bar sa una nga pagtilaw lamang.
Gintinguhaan sang Pinoy pole vaulter nga maabot ang 5.92 meters apang, napaslawan ini sa tatlo ka attempt.
Nagpanguna naman sa nasambit nga torneo si world number 1 kag Paris Olympics gold medalist Mondo Duplantis sang Sweden nga nag-record sang 6.15 meters, nalapawan sini ang 6.10 meters nga hawid duha na ka tuig ang nakaligad.
Samtang, ikaduha naman sa puwesto si Sam Kendricks sang US nga nag-record sang 5.92 meters.
Ini ang una nga pagsabak ni Obiena sa torneo matapos ang Paris Olympics kun sa diin nagtapos siya sa pang-apat nga puwesto.
Ginalauman man nga maga-sabak man siya sa Silesia leg sa Poland nga pagahiwaton sa Agosto 25.
