Nagapaandam si Chief Presidential Legal Counsel Juan Ponce Enrile sa social kag political leaders sa posible adverse consequences sang plano nga zero remittance week sa mga overseas Filipino workers (OFWs)
Ini matapos nga gin-anunsyo sang pila ka mga grupo sa Europe partikular na ang Maisug Croatia nga magalunsar sila sang “Zero Remittance Week” humalin Marso 28 tubtub Abril 4 subong nga tuig.
Sa isa ka pahayag, ginsiling ni Enrile nga kun sin-o man ang nagpanugyan sa mga OFWs nga i-suspend ang remittance sang ila kinitaan sa luwas sang pungsod dapat maghunahuna sang madamo nga beses sa posible mangin epekto sang kasubong nga panugyan sa mga OFWs.
Liwat nga nagpaandam ang opisyal nga ang tagsa ka lihok may kalakip nga posible counter action.
Pananglitan man nga sundon sang iban nga mga OFW ang kasubong nga panugyan, ano ang posible mahitabo kun magdesisyon ang Kongreso nga magbalos kag kanselahon ukon i-suspend ang tax privileges sang mga OFW nga nagasunod sa amo nga panugyan?
Ginsambit man ni Enrile ang tax privileges nga gina-enjoy sang mga OFWs lakip na ang income tax-free sa ila kinitaan sa luwas sang pungsod, wala nagabayad sang travel tax subong man wala nagabayad sang airport fees, exempted man sila sa documentary stamp taxes sa ila remittances kag exempted man sa pag-file sang income tax returns.
Magluwas sini, kinahanglan nga may yara sila sang passport agud makatrabaho bilang OFW.
Suno sa iya, ini ang mga prebilihiyo nga ginhatag sang Kongreso sa mga OFW pinaagi sa mga ginpapasar nga layi.
Kaangut sini, ginrekomendar ni Enrile sa mga OFWs nga tun-an sang maayo ang plano nga ipatuman ang zero remittance week.
