Nakaani sa subong sang nagakalain-lain nga reaksyon ang tatlo ka mga villages sa Madhya Pradesh sa India, bangud sa pagbaton nila sang mga ‘thief schools’ sa diin hanason ang mga bata agud mahimo nga hawod nga mga kriminal partikular na sa pagpangawat.
Pila sa ila nga mga estudyante, naga-edad sang 12-anyos ang gina tudluan sa art sa pagpangawat, pagpanguot kag pagpanghablot.
Ang mga villages sa Kadia, Gulkhedi, kag Hulkhedi nagsikat na karon bangud nahimo na ini nga mga breeding grounds sa mga batan-on nga kriminal kon sa diin ang pila sa mga ginikanan, nagabayad sang tuition fee nga 2,400 tubtob sa 3,600-dolyares agud lang hanason ang pila ka mga kabataan sa pambato nila nga kurso nga ‘dark arts.’
Tudluan sila nga makighinun-anon sa mga kwartahan nga pamilya agud makasulod sa pinaka-exclusive nga mga high-society weddings.
Matapos ang isa ka tuig, maga-graduate ang amo nga batan-on kun sila ang makapangawat na sang mga alahas sa kasal sa mga manggaranon.
Suno pa sa mga pulis, masubra 300 ka mga estudyante nagikan sa amo nga mga talatapan ang naulamid sa pagpangawat sa mga kasal bug-os nga India.
