ROXAS CITY, CAPIZ – Ginpabutyag sang anay City Councilor nga si Atty. Gary Potato ang iya pagkadismaya matapos nga masaksihan ang ginapatigayon nga asphalt overlay sang Department of Public Works and Highways (DPWH) sa Arnaldo Boulevard, Roxas City samtang padayon nga nagaantos ang sa karsada sang Barangay Dayao bangud sang madamo nga lubak kag malain nga kondisyon.
Sa interview sang Bombo Radyo kay Atty. Potato, nakuha ang iya atensyon sang makita niya ang pag-obra sa Arnaldo Boulevard, rason nga ginpiktyuran niya ini kag ginpakigbahin sa social media.
Suno kay Potato, ang Dayao road masami ginareklamo sang mga residente bangud sa kalisod nga dulot sini sa mga motorista, apang tubtub subong wala gihapon masolusyonan.
Dugang pa sang natungdan, sang yara pa siya sa konseho, nagapati sila nga ang DPWH dapat magkay-o kag magmintinar sang Dayao road. Apang nahibaluan nga ang amo nga dalanon yara sa idalom sang hurisdiksyon sang Roxas City Government bangud isa ini ka city road.
Ginkwestyon man ni Potato kun ano ang basehan sang pag-angkon sang syudad sa Dayao road kag indi sang DPWH, gani plano niya nga magpadala sang pormal nga sulat sa ahensya agud klaruhon kun bala sakop sang DPWH ukon sang lokal nga pamunuan ang pagmintinar kag pagkay-o sang amo nga karsada.
Samtang ginkumparar ni Potato ang Dayao road sa iban nga dalanon sa Roxas City nga natigayon ubra sang DPWH, ginpahayag niya nga dapat mauntat na ang sitwasyon nga dasig lang maguba ang ginahimo nga proyekto.
