Gin-appoint si anay eight-division world champion Manny Pacquiao bilang Bise Presidente sang International Boxing Association (IBA).
Makaupod sini si President Umar Kremlev sa pagpatuman sang mga programa nga nakatutok sa mga atleta.
Nahibaluan nga anay kilala bilang Amateur International Boxing Association, ang IBA ang nagadumala sa patag sang boksing sa Olympics. Subong man, makapila na ini ka-bes nga ginpaandaman sang International Olympic Committee (IOC) bangud sa mga isyu sa pagdumala sang pondo kag operasyon antes pa man patigayunon ang Tokyo Olympics sang 2021.
Bangud sini, ginpili sang International Olympic Committee (IOC) ang World Boxing bilang opisyal nga magdumala sang kompetisyon para sa 2028 Los Angeles Olympics.
Ginpahayag ni Pacquiao ang iya nga mga pagpati nga makabulig ang International Boxing Association (IBA) sa pagpabaskog sang boksing sa nagkalain-lain nga pungsod. Suno sa iya, katuyuan nya nga masigurado nga wala sang boksingero ang mapabay-an ukon makalipatan.
