ROXAS CITY – Nagpapanaog sang order ang provincial government nga pagatun-an ang financial assistance nga igahatag sa mga kwalipikado nga drivers nga apektado sa pagsaka sang presyo sang gasolina.
Ini ang ginpahayag ni Mr. Antonio Arbis, Budget officer sang ma-interview sang Bombo Radyo Roxas.
Suno diri nga nag-meeting na sila sang provincial accountant kag kinahanglan nila ang bulig sang Provincial Social Welfare and Development (PSWD) agud ma-determinar kun pila ang numero sang mga kwalipikado nga driver sang tricycle kag jeep sa bilog nga probinsya sang Capiz.
Dugang pa sini nga base sa ila pagpakig-angot sa pila ka mga driver sang trycicle, nagaguwa nga nagagastos ang mga ini sang apat ka litro sang gasolina kada adlaw.
Mahibaluan nga may isa ka grupo sang drivers nga nagpalapit kay Governor Esteban Evan Contreras agud idangop ang ila problema natuhoy sa pagtaas sang presyo sang gasolina.
Indi pa mapat-od sang Budget officer kun pila ang mangin pondo nga kinahanglanon sa financial assistance sang mga drivers tubtob wala pa sang pinal nga numero sang mga kwalipikado nga mga beneficiary nga iga-presentar sang PWSD
Ginklaro man sini nga ang ila mahatagan sang ayuda amo ang mga rehistrado kag legit nga drivers sang jeep kag tricycle.
Ginatugyan na nila ini sa DSWD ang pagpanglista sang mga kwalipikado nga drivers bangud pag-abot sa ayuda ang nasambit nga ahensya ang nakalinyada diri.
Ginpahayag man sini nga wala pa sila nakahibalo kun sa diin makuha sang pondo para sa ayuda sang mga drivers gani kinahanglan nila ang listahan sang mga benepesyaryo agud ma-propose sa sangguniang panlalawigan.
