Nagpabutyag sang tuman nga pagkabalaka si Vice President Sara Duterte natuhoy sang ginpahayag nga insidente sang pagka-lipong ni anay Presidente Rodrigo Duterte samtang yara sa kustodiya sang International Criminal Court (ICC) sa The Hague.
Suno kay VP Duterte, nakabaton ang ila nga pamilya sang impormasyon nga nasapwan nga wala sang alinto ang anay presidente sa sulod sang iya nga selda sa detention facility sa ICC.
Dugang pa ni Duterte, wala sila gilayon nga ginpahibalo sa natabo kag ginpaidalom pa sa pila ka laboratory tests ang anay presidente matapos ang insidente.
Ginpakamalaut man ni VP Duterte ang ginpahayag kapabayaan sang ICC sa ikaayong-lawas sang iya nga amay kag ang padayon nga pagpamalibad sa hingyo nila nga mag-angkon sang 24-oras nga caregiver sa luyo sini.
Ginkwestyon man sang Bise Presidente ang ginpatigayon nga “welfare check” sang mga opisyal sang Philippine Embassy sa The Hague, nga suno sa DFA, kabahin lamang sang ila nga regular nga consular duties para sa mga Pilipino nga nakapreso sa iban
Sa subong, nagahinyo sa gihapon ang kampo sang anay presidente sang temporaryo nga paghilway kag ipaiway sang ICC ang mga legal nga hearing bangud sa ginapahayag nga paglain sang kondisyon ni Duterte.
Madumduman nga una na nga natalana sang Setyembre 23 ang confirmation of charges hearing, apang ginpaiway ini sang pre-trial chamber matapos ginpahayag sang depensa nga indi na siya pwede nga mag-atubang sa amo nga hearing.
