Handa na nga mag-atubang si anay Senador Antonio Trillanes IV agud imbestigaran sang Senado kasunod sang hingyo ni Senador Robin Padilla nga imbestigahan ang ginaalegar mandu nga ginhatag kay Trillanes nga magpatigayon sang welfare check kay anay Presidente Rodrigo Duterte nga detained sa International Criminal Court (ICC) detention facility sa The Hague, Netherlands.
Sa pahayag ni Trillanes sa Bombo Radyo, iya ginsuhestyon nga agud indi mausik ang oras sang mga Senador sa imbestigasyon, ngaa indi na lang idiretso ang anay Presidente kun naka-istorya man ini sang nagpadulong ini sa ICC.
Ginpahayag ni Trillanes nga 24/7 ang access ni Duterte sa telepono, gani mahapos nga makontak ang iya pamilya sa tion nga may kaangay nga pagbisita.
Ginpanginwala man sini nga wala siya gin-assign nga magpatigayon sang welfare check sa anay presidente kag ginpanindugan ang mga pagsulundan sang ICC sa diin indi ka makasulod kon indi magpasugot ang isa ka detainee nga istoryahon ang mga nagabisita diri bisan pa nga ini mismo ang iya himata.
Samtang, ginklaro naman sang Department of Foreign Affairs (DFA) nga kabahin sang ila katungdanan ang anuman nga welfare check base sa Vienna Convention on Consular Relations kag existing Philippine laws nga nagatuyo nga maprotektahan ang kaayuhan sang mga Pilipino sa luwas sang pungsod.
