Pormal nga nag-file sang waiver si Former President Rodrigo Duterte nga indi magtambong sa confirmation of charges hearing sang International Criminal Court (ICC) nga natalana sa Pebrero 23 tubtob 27, 2026.
Sa sulat nga napetsahan Pebrero 17 gikan sa ICC Detention Center, ginpanindugan ni Duterte nga wala niya ginakilala ang hurisdiksyon sang ICC.
Gin-akusahan man sini ang subong nga administrasyon sang Pilipinas nga yara sa likod sang iya rendition ukon pilit nga pagdala sa iya sa Netherlands nga gintawag niya nga kidnapping.
Hugot nga ginpanginwala sang anay Presidente ang mga alegasyon may kaangtanan sa extra-judicial killings nga iya gintawag nga outrageous lies.
Ginsambit man sini ang iya edad kag indi maayo nga panglawas bilang rason sang indi pagtambong.
Ginpakita man sini ang iya kahanda sa pag-atubang sa bisan ano nga mga resulta.
Ginatugyan na lang ni Duterte sa iya abogado ang paghangkat sa ebidensya sang prosekusyon samtang nagapabilin ang iya tagipusuon sa Pilipinas.
