Indi pagpalampason sang House Quad Committee ang mga kabutigan kag pagpangwasak sa mga miyembro sini nga ginapalapta sa nagkalain-lain nga social media platform sang ginapahayag mga balayaran nga vlogger.
Bangud sini, ginhinyo ni Quad Committee overall Chairman kag Surigao del Norte Representative, Robert Ace Barbers, sa National Bureau of Investigation (NBI) nga hibaluon, imbestigahan, kag kasuhan ang mga vloggers nga ginapabayaran suno diri sang mga sindikato sang illegal nga droga kag Philippine Offshore Gaming Operators (POGO) agud magpalapta sang mga pagpangwasak kag kabutigan.
Ang hinyo ni Barbers ang kaungdan sang iya sulat kay NBI Chief Atty. Jaime Santiago.
Magluwas diri, nagsumite man ini sang pauna nga mga ebidensya sa NBI may kaangtanan sa pagpangwasak sa iya utod nga si Surigao del Norte Governor, Lyndon Barbers, nga gina-ulamid sa ginadumilian nga bulong.
Samtang, nagasalig naman ini sa ikasarang sang Cybercrime Division sang NBI nga masolusyunan ang mga cyber-related offense, ilabi na ang mga target gamuhon kag waskon ang isa ka pampubliko nga proseso.
