Ginpanginwala ni Police Captain Merry Chris M. Dela Cruz, hepe sang Sapian Municipal Police Station ang ginapahayag tuyo nga pagkidnap sa banwa sang Sapian.
Sa nakuha nga impormasyon sang Bombo Radyo sa Sapian MPS, ginapahayag nagparekord ang isa ka iloy sa Barangay Hall sang Brgy. Lonoy, banwa sang Sapian, ginapahayag nga ang tuyo nga pagkidnap sa isa ka 9 ka tuig nga bata nga lalaki ang lahog-lahog lamang sang isa ka lalaki nga ginaalegar nga kidnapper sa nasambit nga lugar.
Pahayag ni PCPT. Merry Chris M. Dela Cruz, hepe sang Sapian Municipal Police Station, takna alas-11:00 sang aga sang Agosto 14, 2024 natabo ang amo nga insidente, sang pauli na kun tani ang bata nga lalaki sang ginapahayag nga luyag ini sya ipasabay sang wala makilan-an nga naka-facemask nga lalaki ang amo nga bata sakay sa motorsiklo sini.
Bangud sa kahadlok nga nabatyag kag sa asud-asud nga balita nga nagalapta sa social media natuhoy sa kidnapping cases, suno kay Dela Cruz na-alarma ang iloy sang amo nga bata nga nangin resulta nga nagparekord ini sa Barangay.
Sa natabo nga insidente, gilayon nga nagpatigayon sang barangay checkpoint sa intersection sa ila barangay ang Barangay Officials, kun sa diin gina tsekyar ang mga naka-helmet kag ginapamangkot ang mga ini sang katuyuan sa pagpadulong sa nasambit nga barangay.
Dugang pa ni Dela Cruz, subong palang nakabaton sang report ang Sapian PNP natuhoy sa nasambit nga insidente kag panugyan sini sa mga pumuluyo sa banwa sang Sapian nga kun maka-eksperyensya sang kasubong nga sitwasyon, maayo nga i-report gilayon sa mga otoridad. Sa mga ginikanan, atipanon kag siguraduhon nga safe ang ila mga kabataan.
