ROXAS CITY – Nagdepensa ang punong barangay sang Barangay Dayao, Roxas City natuhoy sa ginapahayag wala pag-obserbar sang social distancing sang mga pumuluyo sang nagpanghatag sang bugas ang gobyerno sang siyudad sa nasambit nga lugar.
Suno kay Punong Barangay Emily Ariza, nagapati siya nga pagpangguba lamang ang motibo sang persona nga nagkuha sang mga laragway nga ginpalapta sa social media.
Ginpahayag sini nga makit-an sa laragway nga wala pa sang may ginapilahan nga bugas ang mga pumuluyo kag ginkuhaan lamang sang picture sang kasubong nagtumpok sa kilid sang dalan ang mga tawo.
Ginklaro sini nga ginpakamaayo nila nga sa barangay hall patigayunon ang pagpanagtag sang 911 ka mga sako sang bugas sa mga pumuluyo.
Ini agud makontrolar ang mga tawo pinaagi sa hugot nga pagbantay sang mga opisyales sang barangay.
Panindugan ni Ariza nga wala sila sang rason nga indi pagsundon ang mga health protocols bangud nahangpan na sang tanan ang kaimportansiya sini.
Ginpahayag pa sang opisyal nga mahalong ang mga pumuluyo sang Barangay Dayao bangud indi man lipod sa ila ihibalo nga may narekord nga mga kaso sang COVID-19 sa amo nga barangay.
