ROXAS CITY – Nagdepensa na ang ginareklamo nga manunudlo nga ginaalegar naghatag sang 65 nga grado sa isa ka estudyante sa Bergante Elementary School sa banwa sang Mambusao, Capiz.
Ini matapos nga personal nga nagpadulong sa talatapan sang Bombo Radyo si Mrs. Lourdes Lamayo kaupod si Mrs.Violeta Laurilla ang head teacher sang nasambit nga buluthuan.
Hugot nga ginpanginwala ni Lamayo nga gintawag sini nga bundol ang apo ni Elizabeth Marcelo.
Ginpahayag sang manunudlo nga wala tanan sang kamatuoran ang mga alegasyon sa iya ni Marcelo bangud sa pagkamatood suno sa iya nga ginhatagan pa sang konsiderasyon ang amo nga estudyante nga makaeskwela liwat matapos nga nagsuprer ini sang balatian kag nagpaidalom sa operasyon.
Suno kay Lamayo nga wala sini ginretoke ang card sang estudyante subongman wala sang may ginpirmahan ang nasambit nga ginang.
Aminado ang manunudlo nga ginlagbong sini ang estudyante bangud wala na ini nagabalik sa eskwelahan.
Gin-athag pa sini nga naka-eskwela pa sang 1st grading ang amo nga estudyante apang pag-abot sang 2nd tobtob sa 4th grading masami na ini naga-absent rason nga wala na ini nakakuha sang mga quiz kag exams.
Dugang pa sang manunudlo nga wala man sang kamatuoran ang akusasyon sa iya sang lola nga ginakwartahan niya ang mga estudyante.
Samtang, ginpahayag naman sang head teacher nga si Mrs. Violeta Laurilla nga una pa lang ginhusay na sini ang adviser kag lola sang amo nga estudyante matapos nga nagreklamo ini sa district office sang Department of Education sa amo nga banwa sa din nagpangayo pa sang pasensya sa iya si Lamayo.
Apang, nakibot na lamang sila sang nabatian sa radyo ang reklamo sang ginang.
