ROXAS CITY-Indi pa makapasalig ang gobernador sa probinsya sang Capiz nga gilayon nga makapauli ang kapin sa 30 ka mga capizeño displaced workers nga nastranded sa isla sang Boracay.
Ini ang ginpabutyag ni Capiz Governor Esteban Evan “Nonoy” Contreras II matapos nga nakalab-ot sa iya ang panawagan sang mga displaced workers sa Boracay apang indi pa ini makadesisyon bangud magapakig-angut pa ini sa mga local chief executives sa mga kabanwahanan kun pahanugotan sila nga makapauli sa probinsya.
Suno kay Contreras nga may pila ka mga Local Government Units (LGU’s) ang nagakahangawa sa seguridad sang probinsya sa tion nga pasugtan ang mga displaced workers nga makapauli sa Capiz.
Pagatinguhaan man ni Contreras nga makapaidalum sa covid-19 testing ang mga displaced workers sa Boracay subong nga semana agud mapadasig ang ila nga pagpauli sa probinsya.
