ROXAS CITY – Ginlagdaan sang gobernador ang ordinansa nga nagadumili sa pagpatigayon sang large scale mining operation sa probinsiya.
Kadungan ini sa ginpatigayon nga event nga Kampo Kalikasan sa banwa sang Pontevedra sa diin gintambungan sang gobernador.
Ginpahayag ni Governor Esteban Evan Nonoy Contreras nga wala sini gintayming ukon ginplano ang pagpirma sa amo nga ordinansa sa gintambungan nga event.
Apang nagapati ang opisyal nga simboliko ini bangud kasubong natuon sa kahiwatan may kaangtanan sa pag-amlig sa palibot ang ginpirmahan nga ordinansa.
Suno pa Contreras nga ginapakita lamang sa iya paglagda sa ordinansa nga wala sang kamatuoran ang naglapta nga report nga ginpunduhan ang iya nga kandidatura sang mga mining firms kasubong sa ginapasibangud sang iya mga kasumpong sa pulitika.
Samtang ginklaro sang gobernandor nga wala malakip sa ordinansa ang small scale mining kasubong sa pagquarry sang balas, bato, buga kag iban pa bangud kinahanglan ini sang gobyerno para sa development sang probinsiya.
