ROXAS CITY – Nagpadulong ang grupo sang mga estudyante gikan sa magkatuhay nga mga eskwelahan sa siyudad sang Roxas sa kapitolyo-probinsiyal agud magpangusisa sa estado sang ila scholarship sa idalom sang Aksyon-Agad scholarship program sang Del Rosario administration.
Mahibaluan nga nangin kontrobersiyal ang nasambit nga programa matapos temporaryo nga ginpauntat sang administrasyon ni Governor Esteban Contreras.
Ang nasambit nga mga estudyante ang gikan sa Filamer Christian University (FCU) kag Hercor College nga nagpakigsapol sa mismo gobernador kag may iban man nga nakahinala si provincial administrator Edwin Monares.
Nagpangusisa ang nasambit nga mga estudyante kun makahatag pa sang kantidad ang gobyerno-probinsiyal nga ila igabayad sa ila tuition fees agud makakuha sang final examination para sa first semester.
Suno kay Monares, plano karon sang gobyerno nga magpadala sang sulat sa mga eskwelahan sang mga scholars nga nagapahanumdom natuhoy sa memorandum sang Commission on Higher Education (CHED) nga indi mahimo nga indi pagpakuhaon sang examination ang estudyante kun indi ini makabayad sang tuition fees.
Liwat man sini nga ginpanindugan nga nalaktan sang lamud-pamulitika sang nakaligad nga administrasyon ang nasambit nga programa rason nga kinahanglan nila ini nga ligwaton.
Sa pagpangusisa sang Bombo Radyo sa pamunuan sang Hercor College, nahibaluan nga masobra sa 700 ang ila estudyante nga benepisyaryo sang amo nga programa sini nga school year 2019-2020 nga mas dako kun ikomparar sa numero sang scholars sang nakaligad nga school year nga naglab-ot lamang sa masobra 400 ka mga estudyante.
Suno pa sa pamunuan sang eskwelahan, strikto sila sa ila nga pagsulundan kag indi pagpakuhaon sang exam ang indi makabayad sang ila tuition.
Apang nagpasalig man ang nasambit nga buluthuan nga iga-refund ang kwarta sang mga estudyante sa tion nga makahatag na ang gobyerno-probinsiyal para sa ila nga scholarship.
Mahibaluan nga ang mga estudyante sa pribado nga eskwelahan nga kwalipikado para sa nasambit nga programa ang sadto anay nagabaton sang P10, 000 kada semester apang tubtob subong wala pa sang may nahatag ang gobyerno-probinsiyal sa nasambit nga mga scholars.
(FEATURED IMAGE FROM KABALAKA INFORMATION CENTER)
